நமசிவாய வாழ்க.. நாதன் தாள் வாழ்க..

நம சிவாய வாழ்க.. நாதன் தாள் வாழ்க..

நம சிவாய

பூ நாளும் தலை சுமப்ப - புகழ் நாமம் செவி கேட்ப - நா நாளும் நவின்றேத்தப் பெறலாமே நல்வினையே!..

வாழி அவன்தன் வளநாடு மகவாய் வளர்க்கும் தாயாகி

ஊழி உய்க்கும் பேருதவி ஒழியாய் வாழி காவேரி!..


சனி, டிசம்பர் 16, 2017

மார்கழிக் கோலம் 01

ஓம்

தமிழமுதம்


அகரமுதல எழுத்தெல்லாம் ஆதி
பகவன் முதற்றே உலகு.. (01)

பாலும்தெளி தேனும் பாகும் பருப்புமிவை
நாலுங் கலந்துனக்கு நான் தருவேன் கோலஞ்செய்
துங்கக் கரிமுகத்துத் தூமணியே நீயெனக்குச்
சங்கத் தமிழ் மூன்றும் தா..
-: ஔவையார் :-
***
திரு அரங்கன்
பல்லாண்டு பல்லாண்டு பல்லாயிரத்தாண்டு
பலகோடி நூறாயிரம்
மல்லாண்ட திண்தோள் மணிவண்ணா நின்
சேவடி செவ்வித் திருக்காப்பு..

அடியோமோடும் நின்னோடும் பிரிவின்றி ஆயிரம் பல்லாண்டு
வடிவாய்நின் வலமார்பினில் வாழ்கின்ற மங்கையும் பல்லாண்டு
வடிவார்சோதி வலத்துறையும் சுடராழியும் பல்லாண்டு
படைபோர்புக்கு முழங்கும் அப்பாஞ்ச சன்னியமும் பல்லாண்டே!..
-: பெரியாழ்வார் :-

மாதங்களில் நான் மார்கழி!..

- என்றுரைக்கின்றான் - ஸ்ரீகிருஷ்ணன்..

அந்த அளவுக்கு மங்கலகரமானவை மார்கழியின் நாட்கள்..

மார்கழியின் முதல் விடியலிலிருந்து தேவர்களுக்கு வைகறைப் பொழுது..
ஆலயங்கள் தோறும் திருப்பள்ளி எழுச்சி!.. தனுர் மாத வழிபாடுகள்!..  

தெருக்கள் தோறும் இல்லங்களின் தலைவாசலில் எழில் மிகும் கோலங்கள்!.. 

வண்ண வண்ணப் பூக்கள்!. . சுடர் விடும் அகல் விளக்குகள்!..

ஏன்!.. இதற்கு முன் வாசலில் கோலங்கள் இட்டதில்லையா?..
அவற்றில் பூக்களையும் அகல் விளக்குகளையும் வைத்ததில்லையா?.. 

அதற்கு முன் வாசலில்
கோலமிட்டு பூக்களையும் விளக்குகளையும் வைத்தார்கள் தான்!..

பிறகு!?..

இந்த மார்கழி முழுதும் பொருள் பொதிந்த கோலங்கள்..

அப்படி என்றால்?..

கோலத்தின் நடுவே -
பசுஞ்சாண உருண்டையில் பூசணிப் பூ ஒன்றை வைப்பார்கள்!.. 

அதன் பொருள் -
இந்த வீட்டில் பூ ஒன்று பூவை என்று பூத்திருக்கின்றது!.. 
கன்னி ஒருத்தி இருக்கின்றாள் என்பதை இலை மறைவு காயாக உணர்த்துவதாகும்!..

அந்தக் காலத்தில் கன்னிப் பெண்கள் வீட்டை விட்டு வெளியே வராத சூழ்நிலை..

இன்று அப்படி இல்லை.. என்றாலும் -
மார்கழிக் கோலங்களுக்கு மகத்துவம் அதிகம்..  


மங்கலம் சிறக்க வேண்டும்!.. மனையறம் செழிக்க வேண்டும்!..
மதிநலம் விளைய வேண்டும்!... மண் பயனுற வேண்டும்!.. 

இவை யாவும் எங்கிருந்து தோன்றும் ?.. 

ஒளி படைத்த நல்ல மனங்களின் உள்ளிருந்து!.. 

அப்படி ஒரு ஒளி - அதுவும் பேரொளி - 
ஏறத்தாழ ஆயிரத்து இருநூறு ஆண்டுகளுக்கு முன் - 
ஸ்ரீவில்லிபுத்தூரில் திருத்துழாய் வனத்தில் உதித்த 
கோதை நாச்சியார் தம் திருஉள்ளத்தில் தோன்றியது!..  

அதன் பெயர் தான் -  திருப்பாவை!..

திருப்பாவை என்பது ஒரு நூல் அல்ல!.. 

நம்மை உயர்நிலைக்கு இட்டுச் செல்லும் வாழ்வியல் நெறி...

மங்கலகரமான மார்கழி முழுதும் நம்மை வழிப்படுத்துகின்றாள்  - சூடிக் கொடுத்த சுடர்க் கொடியாள்!..

நம்மை அவள் அழைக்கின்றாள் - மார்கழி நீராடலுக்கு!.. 
வாருங்கள் - அவள் துணையுடனே செல்வோம்!..
***

நல்லதோர் வீணை


அருளமுதம் 

சூடிக்கொடுத்த சுடர்க்கொடி
ஸ்ரீ ஆண்டாள் அருளிய
திருப்பாவை
திருப்பாடல் - 01
***
நன்றி - திரு. கேசவ் ஜி
மார்கழித் திங்கள் மதி நிறைந்த நன்னாளால் 
நீராடப் போதுவீர் போதுமினோ நேரிழையீர் 
சீர்மல்கும் ஆய்ப்பாடிச் செல்வச் சிறுமீர்காள் 
கூர்வேல் கொடுந்தொழிலன் நந்தகோபன் குமரன் 
ஏரார்ந்த கண்ணி யசோதை இளஞ்சிங்கம் 
கார்மேனி செங்கண் கதிர்மதியம் போல் முகத்தான்
நாராயணனே நமக்குப் பறை தருவான் 
பாரோர் புகழப் படிந்தேலோர் எம்பாவாய்!..

ஓம் ஹரி ஓம்!..
 ***

சிவ தரிசனம்
தில்லை திருச்சிற்றம்பலம்


இறைவன் - ஆனந்தக்கூத்தன்
அம்பிகை - சிவகாமசுந்தரி
தீர்த்தம் - சிவகங்கை
தலவிருட்சம் - தில்லை

அங்கே அரங்கம்!..

வைணவத்தில் கோயில் எனில் - 
திருஅரங்கம்..
அரிதுயில் கோலத்தில் அரங்க நாதன்.. 

இங்கே அம்பலம்!..

சைவத்தில் கோயில் எனில் - 
தில்லைத் திருச்சிற்றம்பலம்..
ஆனந்தக் கூத்தனாக அம்பலவாணன்..

ஐயன் அம்பிகையுடன் 
ஆனந்தத் திருநடனம் நிகழ்த்தும் திருத்தலம்...
பஞ்சபூதத் தலங்களுள் ஆகாயத் திருத்தலம்..

- பாடிப் பரவியோர் - 
திருஞானசம்பந்தர், திருநாவுக்கரசர்,
சுந்தரர், மாணிக்கவாசகர்..
மற்றும் பல உத்தம அடியார்கள்..

தீர்த்தனைச் சிவனை சிவலோகனை
மூர்த்தியை முதலாய ஒருவனைப் 
பார்த்தனுக்கு அருள் செய்த சிற்றம்பலக்
கூத்தனைக்கொடியேன் மறந்துய்வனோ..(5/2) 
-: அப்பர் பெருமான் :- 
***


ஸ்ரீ திருநாவுக்கரசர் அருளிய
தேவாரம் 


அப்பன் நீ அம்மை நீ ஐயனும் நீ
அன்புடைய மாமனும் மாமியும் நீ
ஒப்புடைய மாதரும் ஒண்பொருளும் நீ
ஒரு குலமும் சுற்றமும் ஓரூரும் நீ
துய்ப்பனவும் உய்ப்பனவும் தோற்றுவாய் நீ
துணையாய் என் நெஞ்சம் துறப்பிப்பாய் நீ
இப்பொன் நீ இம்மணி நீ இம்முத்து நீ
இறைவன் நீ ஏறூர்ந்த செல்வன் நீயே!.. (6/95)
***

ஸ்ரீ மாணிக்கவாசகர் அருளிச் செய்த
திருப்பள்ளியெழுச்சி
திருப்பாடல் - 01


போற்றிஎன் வாழ்முதல் ஆகிய பொருளே
புலர்ந்தது பூங்கழற்கு இணைதுணை மலர்கொண்டு
ஏற்றிநின் திருமுகத்து எமக்கருள் மலரும்
எழில்நகை கொண்டுநின் திருவடி தொழுகோம்
சேற்றிதழ்க் கமலங்கள் மலருந்தண் வயல்சூழ்
திருப்பெருந் துறையுறை சிவபெருமானே
ஏற்றுயர் கொடியுடையாய் என்னை உடையாய்
எம்பெருமான் பள்ளி எழுந்தருளாயே!.. 
***

மீண்டும் மார்கழியில்
தேவாரம்
திருப்பாவை திருவெம்பாவை
ஆகிய தெய்வப் பனுவல்களின்
திருப்பாடல் பதிவுகளை
வழங்குதற்குப் பேறு பெற்றேன்..

இன்று முதல் நமது தளத்தில்
ஆறாவது ஆண்டாக 
மார்கழிப் பதிவுகள் தொடர்கின்றன..

ஓம் நம சிவாய சிவாய நம ஓம்!..
***

வியாழன், டிசம்பர் 14, 2017

சிவகங்கைப் பூங்கா 3


தஞ்சை மாநகரின்
சிவகங்கைப் பூங்காவைப் பற்றிய மூன்றாவது பதிவு..


பூங்காவின் நீர் சறுக்குப் பகுதி நீச்சல் குளம், சிவகங்கைக் குளம் 
இவற்றைக் கடந்து பூங்காவின் வாசல் அருகே வந்து விட்டோம்..

இங்கே பழுதடைந்து கிடக்கின்றது -
பலகாலமாக ஓடிக் கொண்டிருந்த சிறுவர் ரயில்...

இதனுள்ளும் சிலர் அமர்ந்து கொண்டு அரட்டை அடித்துக் கொண்டிருந்தனர்..

ஓடிக் களைத்த ரயில்
இதற்கு முன் ஒன்று (1965 ல்) இருந்தது..

பூங்காவினுள் நுழைந்ததும் மயில் கூண்டிற்கு அருகில் சின்னதாக ஸ்டேஷன்..

அங்கே டிக்கெட் வாங்கிக் கொண்டு ஏறினால் -
விலங்குகளின் கூண்டுகள் வழியாக பதினைந்தடி உயரமுள்ள குகையின் உள்ளே புகுந்து வெளிவரும்..

அடுத்த ஸ்டேஷன் புள்ளிமான் கரடு.. 
மான்கள் திரியும் தோட்டத்தின் வழியாக பறவைகள் பூங்கா, நீச்சல் குளம்..

இங்கே ஒரு ஸ்டேஷன் - சிவகங்கைக் குளம்...
அங்கிருந்து புறப்பட்டால் - நுழைவாயில்.. புறப்பட்ட இடம்..

வறண்டு கிடக்கும் நீரூற்று
வெளியே வரும் வாசலில் - ஆள் உயரத்திற்கு வெள்ளைச் சீருடையில் ஸ்டேஷன் மாஸ்டர் - தத்ரூபமான சுதை சிற்பம்..

இதைப் போலவே - 
தோட்டக்காரர், மீனவர், ஆடுபுலி விளையாடுவோர், இளங்காதலர் - என, சுதை சிற்பங்கங்கள் இருந்தன..

இப்போது ஆடுபுலி விளையாடுவோர் சிற்பம் மட்டும் சிதிலமடைந்து கிடக்கின்றது..

பழைய ரயில் பாதை, குகை எல்லாம் இப்போது கிடையாது..



இன்றைக்கு இருக்கும் சிறுவர் ரயிலில் சின்னதாக வட்டமிடுவதற்கும் கட்டணம்..

முன்பெல்லாம் மாலை வேளைகளில் 
வானொலி நிகழ்ச்சிகள் ஒலிபரப்பப்படும்..
கலை நிகழ்ச்சிகளும் வாரந்தோறும் நடைபெறும்..

அவ்வப்போது 
திறந்தவெளி அரங்கில் அரசின் செய்திச் சுருளும் திரையிடப்படும்.. 

இப்போது அவையெல்லாம் நடைபெறுவதாகத் தெரியவில்லை..

வாலிபர்களுக்காக இருந்த பெரிய சறுக்கு மரமும் இப்போது இல்லை...

நடைபாதை ஓரமாக அமர்வதற்காக அமைக்கப்பட்டிருக்கும் இருக்கைகள் பலவும் சிதைந்து இருக்கின்றன..

நிழல் கூடங்களில் வெட்டிக் கூட்டம்
பூங்காவின் தெற்குப் பக்கமுள்ள மண்டபங்களில் வெட்டிக் கூட்டம் தூங்கிக் கிடக்கின்றது...

பூங்காவில் எடுக்கப்பட்ட படங்கள் சற்றே மேல் நோக்கியதாகவே இருக்கும்..

காரணம் -
ஆங்காங்கே கல்லூரிகளைக் கடந்து வந்திருக்கும் இளம் பருவத்தினர்...


இதைத் தான் திரு Dr. B. ஜம்புலிங்கம் அவர்களும்
திரு தமிழ் இளங்கோ அண்ணா அவர்களும் குறிப்பிட்டிருந்தார்கள்...


இந்தப் பூங்கா இன்னும் சிறப்பாக பராமரிக்கப்படவேண்டும் என்பது அனைவருடைய விருப்பமாகும்..



யானைமுக நீரூற்றினை சீர்ப்படுத்த வேண்டும்..
மீண்டும் வண்ண விளக்குகளுடன் பொலிவு பெற வேண்டும்..


பரிதாபமாக கூண்டுக்குள் முடங்கிக் கிடக்கும் சீமை எலி, முயல்கள் 
இவற்றை மீண்டும் வனப்பகுதிக்குள் விட்டு விடவேண்டும்..

மான்களின் பூங்காவுக்குள் செயற்கை அருவி ஒன்றை அமைக்கவேண்டும்...
மான்கள் வாழுமிடத்தில் இயற்கையாக புல்வெளியை உருவாக்க வேண்டும்..

வெளியில் இருந்து வந்து பூங்காவுக்குள் சுற்றித் திரியும் 
மயில்களுக்கு இச்சூழ்நிலை மிகவும் உகந்ததாக இருக்கும்..


தொங்கும் தொட்டில் சிறப்பாக பராமரிக்கப்படுவதுடன்
பாதுகாப்பை மேம்படுத்தி சிவகங்கைக் குளத்தின் நடுவிருக்கும் கோயிலுக்கு மக்கள் சென்று வரும்படி செய்தல் வேண்டும்...

அநாவசியமாக பூங்காவினுள் சுற்றித் திரிவோரை அப்புறப்படுத்த வேண்டும்...



பாரம்பர்யத்தைக் காட்டும் சுதை சிற்பங்கள் 
மீண்டும் அமைக்கப்படவேண்டும்..

சிறுவர்களுக்காக புதிதாக அமைக்கப்பட்டுள்ள
காற்றடைக்கப்பட்ட சறுக்கு மேடைகளும்
நாற்சக்கர (மின்கல) வாகனங்களும்
மிதி படகுத் தொட்டிகளும் சிறப்பாக பராமரிக்கப்பட வேண்டும்..

பூங்காவினுள் குடிநீர்க் குழாய்களைக் கண்டேனில்லை..
உணவகம் ஒன்று இருப்பது காரணமாக இருக்கலாம்...

ஆப்பிரிக்க பாலைவனத்தில் காணப்படும் மரம் நம்மிடையே வளர்ந்திருப்பதை வளரும் தலைமுறையினருக்கு உணர்த்தவேண்டும்..

சுற்றுலா வரும் பள்ளிப் பிள்ளைகள் தெரிந்து கொள்ளும் விதமாக
இங்கே இருக்கும் யானைக்கால் (Adansonia Digitata ) மரத்தைப் பற்றிய
முழு விவரங்களையும் பதிவு செய்து வைக்க வேண்டும்...


சிவகங்கைப் பூங்காவில் மீண்டும்
செண்பக மரங்களும் நாகலிங்க மரங்களும் தழைக்க வேண்டும்...

மோதகவல்லியின் பழங்கள்
யானைக்கால் மரத்தைப் போலவே -
இன்னொரு பழைமையான மரமும் இந்தப் பூங்காவில் அமைந்துள்ளது...

கிழக்குப் பக்க மதிற்சுவர் அருகே உள்ள இம்மரத்தின் பெயர் - மோதகவல்லி...

பூங்காவை விட்டு வெளியே வந்த பிறகு தான் இதைப் பற்றி நினைவு வந்தது..

மறுபடி பூங்காவிற்குச் செல்ல முயன்றும் இயலவில்லை...
எனவே இணையத்திலிருந்து எடுக்கப்பட்ட படம் -இங்கே..

மோதகவல்லி எனப்படும் இம்மரத்தின் பெயர் - Sterculia Foetida என்பதாகும்..
Java Almond என்றும் குறிக்கப்படுகின்றது...

கொழுக்கட்டை போன்ற வடிவத்தில் இதன் காய்கள் இருக்கின்றன..

ரத்த மூலத்திற்கான சூரணம் இம்மரத்தின் பட்டைகளில் இருந்து தயாரிக்கப்படுகின்றது...


பூங்காவின் நுழைவாயிலை அடுத்தாற்போல
ஸ்க்வார்ட்ஸ் தேவாலயம் (Schwartz Church அமைந்துள்ளது...


மராட்டிய மன்னர் இரண்டாம் சரபோஜி (1777-1832) தனது இளமையில் தனக்கிருந்த அரசியல் நெருக்கடிகளில் இருந்து தன்னைப் பாதுகாத்து அரசுரிமையை மீட்டுத் தந்த ஸ்க்வார்ட்ஸ் (Rev.Schwartz) பாதிரியாருக்காக அமைத்த தேவாலயம் இதுவாகும்..

இது டேனிஷ் மிஷனரியால் 1779 ல் கட்டப்பட்டது...


பூங்காவின் கோட்டை வாசலருகே சஞ்சீவி ஆஞ்சநேயர் திருக்கோயில்..

ஆஞ்சநேயர் கோயிலின் அருகே -
கைவினைக் கலைஞர்களின் கடும் உழைப்பினால்
பலா மரங்களில் இருந்து வீணைகள் வெளிப்பட்டுக் கொண்டிருந்தன...



மீட்டும் கரங்களுக்காக - வீணையை
வியர்வைத் துளிகளுடன் வடித்துக் கொண்டிருந்தன
உழைக்கும் கரங்கள்!..


என்ன இருந்தாலும்
அவ்வளவு பெரிய பூங்காவினுள் சுற்றித் திரிந்து
சிவகங்கைக் குளத்தின் அழகில் ஆழ்ந்திருக்கும்போது
ஆரவாரங்கள் அற்று மனம் அமைதியுறுவதையும்
சொல்லத்தான் வேண்டும்!..

சுற்றித் திரியும் மயில்களுள் ஒன்று
ஆயிரம் ஆண்டுகளைக் கடந்து விளங்கும் பூங்கா என்பது சிறப்பு...

தஞ்சைக்குக் கிடைத்த பெருமைகளுள் சிவகங்கைப் பூங்காவும் ஒன்று..
இந்தப் பூங்கா எழிலோடும் பொலிவோடும் விளங்குதல் வேண்டும்..

அதுவே 
தஞ்சைக்கு மேலும் பெருமை...

வாழ்க நலம்...
***